من ام بنینم نفسیم جانیم حسیندی
من ام الابالفضلم و ایمانیم حسیندی
---
من رهرو دینم که امامیمده حسیندی
اصل هدفیم، راه و مرامیمده حسیندی
هم تکیه گهیم، پشت و پناهیمده حسیندی
هیچ سویلمیون فاطمیه ام یا که عزیزم
من فاطمه نون اوغلونا واللهی کنیزم
---
هر چند ابالفضل بالامون مادریم من
یا اینکه علی شیر خدا همسریم من
واللهی خانم فاطمه تک حیدریم من
عشقیله بو قلبون ضربانلاری علی دور
اوغلانلاریمون رگده کی قانلاری علی دور
---
دنیاده علی تک، کیم اولا رهبر اولانمز
واللهی علیدن، کیم اولا برتر اولانمز
زهرا کیمی هیچ کس اونادا همسر اولانمز
هم من هم ابالفضل، هامی اوغلانلاریمیلان
با هم اولاروخ فاطمه نون اوغلونا قربان
---
ای کرب و بلا قاصدی سویله اوزمانی..
..مقتلده چیخوردی آقامون خسته لی جانی
گوداله توکولموشدی اونون لخته لی قانی
سوئله باشینون اوستونه آیا گلن اولدی؟
غسل ایله دیلر؟ یا دئنن آیا کفن اولدی؟
---
ایکاش گلیدی باشا هجران و فراقی
ای کاش اولیدیم باشی اوستونده قوناقی
اوخشیدیم اونی فاطمه تک من بو سیاقی
گل پیکری صد پاره بالام لای لای حسینیم
بلبللری آواره بالام لای لای حسینیم
---
ای کرب و بلا قاصدی جانانیم هایاندا؟
دردیم چوخالوب، چاره سی درمانیم هایاندا؟
عباس دلاور کیمی اصلانیم هایاندا؟
آخر نه دیوم اوغلووا آخشاملار ابالفضل؟
وقتی سنه خاطر داریخوب آغلار ابالفضل
... شاعر: اکبر پورآقا
